તામિલનાડુના કુન્નુરમાં હેલિકોપ્ટર અકસ્માતની તપાસ પૂરી, રક્ષામંત્રી રાજનાથ સિંહને સોંપ્યો રિપોર્ટ

Face of Nation 05-01-2022: તામિલનાડુના કુન્નુરમાં આઠ ડિસેમ્બરે થયેલા હેલિકોપ્ટર અકસ્માતની તપાસ પૂરી થઈ ગઈ છે. ભારતીય વાયુસેનાના ટોચના અધિકારીઓએ રક્ષામંત્રી રાજનાથ સિંહને આ મામલે એક વિસ્તૃત રિપોર્ટ સોંપ્યો છે. કઈ પરિસ્થિતિમાં ચોપર દુર્ઘટનાનો ભોગ બન્યું તે જાણકારી હવે બહુ જલદી દેશની સામે આવશે. અત્રે જણાવવાનું કે આ અકસ્માતમાં વાયુસેનાનું MI-17V5 હેલિકોપ્ટર દુર્ઘટનાગ્રસ્ત થયું હતું અને તેની તપાસ ટ્રાઈ સર્વિસિઝની ટીમે કરી છે.

એએનઆઈના જણાવ્યાં મુજબ આ રિપોર્ટમાં દુર્ઘટનાના કારણોની જાણકારી અપાઈ છે અને ભવિષ્યમાં વીઆઈપી ઉડાણમાં ચોપર સંચાલન માટે પોતાની ભલામણો પણ આપી છે.

તામિલનાડુના સુલુર એરબેસથી વેલિંગ્ટનમાં ડિફેન્સ સર્વિસ સ્ટાફ કોલેજ જતી વખતે વાયુસેનાનું MI-17V5 હેલિકોપ્ટર દુર્ઘટનાગ્રસ્ત થયું હતું. આ અકસ્માતમાં ચીફ ઓફ ડિફેન્સ સ્ટાફ જનરલ બિપિન રાવત અને તેમના પત્ની તથા 12 અન્ય શૂરવીરો શહીદ થયા હતા.

એર માર્શલ માનવેન્દ્ર સિંહના નેતૃત્વવાળી તપાસ ટીમે રક્ષામંત્રી રાજનાથ સિંહને વિસ્તારથી જાણકારી આપી અને જણાવ્યું કે આખરે કઈ સ્થિતિમાં આ હેલિકોપ્ટર ક્રેશ થયું. આ સાથે જ ટીમે એમ પણ જણાવ્યું કે વાયુસેનાનું MI-17 હેલિકોપ્ટર કેમ ક્રેશ થયું. રક્ષામંત્રી સામે પ્રેઝન્ટેશન દરમિયાન તપાસ ટીમ સાથે વાયુસેનાના સિનિયર ઓફિસરો પણ હાજર રહ્યા.

તપાસ કમિટીએ વાયુસેના અને આર્મી સંબંધિત અધિકારીઓના નિવેદનો રેકોર્ડ કર્યા. આ સાથે જ એ તમામ સ્થાનિક લોકો સાથે વાતચીત કરી જે આ દુર્ઘટનાના પ્રત્યક્ષદર્શી હતા. આ ઉપરાંત તે મોબાઈલ ફોનની પણ તપાસ કરાઈ જેના દ્વારા હેલિકોપ્ટર ક્રેશ થયું તે પહેલા વીડિયો શૂટ કરાયો હતો. ક્રેશ થયેલા હેલિકોપ્ટરનો એફડીઆર એટલે કે ફ્લાઈટ ડેટા રેકોર્ડર (બ્લેક બોક્સ) પણ ઘટનાસ્થળેથી મળી આવ્યું હતું. તેનો ડેટા પણ રિપોર્ટમાં સામેલ કરાયો છે.(આપની આસપાસ બનતી માહિતીના ફોટા કે વિડીયો અથવા આપની રજુઆત કે જેને તમે સમાચારમાં સ્થાન આપવા માંગતા હોવ તેને અમને 9328282571 ઉપર વોટ્સએપ કરો અથવા faceofnation@gmail.com ઉપર ઇમેઇલ કરી શકો છો. આપ ટેલિગ્રામની joinchat/SG0NAxhmbJweEQL1Ov-lkg આ લિંક ઓપન કરી ગ્રુપમાં જોડાઈ દરરોજે સમાચારની અપડેટ સમયસર મેળવી શકો છો તથા ટેલિગ્રામમાં અમારી ચેનલ પણ સબસ્ક્રાઇબ કરી શકો છો જેનું નામ છે : faceofnation1. ફેસબુકમાં પણ faceofnation.news નામથી સર્ચ કરી લાઈક કરીન સતત અપડેટ મેળવી શકો છો. ટ્વીટરમાં FaceOfNation1 નામથી સર્ચ કરી ફોલો કરી સતત અપડેટ મેળવી શકો છો).