Face Of Nation 24-04-2022 : રાજ્યમાં ફરી એકવાર અંગ દઝાડતી ગરમી જોવા મળશે. હવામાન વિભાગે આગામી ચાર દિવસ સુધી રાજ્યના અનેક જિલ્લાઓમાં હિટવેવની આગાહી કરી છે. આ જિલ્લાઓમાં તાપમાનનો પારો 42 ડિગ્રી સુધી રહી શકે છે. શનિવારે અમદાવાદ સહિત 4 શહેરોમાં ગરમીનો પારો 42 ડિગ્રી અને 5 શહેરોમાં 41 ડિગ્રી પાર કરી ગયો હતો. શનિવારે અમદાવાદનું મહત્તમ તાપમાન સામાન્ય કરતાં 1.1 ડિગ્રી વધીને 41.5 ડિગ્રી અને લઘુત્તમ તાપમાન 1.5 ડિગ્રી વધીને 26.5 ડિગ્રી નોંધાયુ હતું. આગામી દિવસોમાં અમદાવાદમાં ક્રમશ ગરમીમાં વધારો થવાની શક્યતા હવામાન વિભાગે વ્યક્ત કરી છે.
28મી એપ્રિલ સુધી હિટવેવની આગાહી
હવામાન વિભાગ મુજબ, આગામી 28મી એપ્રિલ સુધી રાજ્યના અનેક જિલ્લાઓમાં હિટવેવની શક્યતાઓ છે. દક્ષિણ ગુજરાતના સુરત, વલસાડ, સૌરાષ્ટ્રના પોરબંદર, જુનાગઢ, ગીર સોમનાથ, કચ્છ, રાજકોટ, અમરેલી તથા ઉત્તર ગુજરાતમાં બનાસકાંઠા, પાટણ, સાબરકાંઠા તથા ગાંધીનગર અને અમદાવાદ જિલ્લામાં યેલો એલર્ટ જાહેર કરાયું છે. આ જિલ્લાઓમાં કો-મોર્બિડ લોકો, વૃદ્ધો તથા નાના બાળકોને તડકામાં બહાર જવાનું ટાળવાની સલાહ આપવામાં આવી છે, તથા લોકોને લાઈટ કલરના અને લૂઝ કોટનના કપડા પહેરવા અને બપોરના સમયે બહાર જતા માથાના ભાગને કવર કરવા કહેવાયું છે.
10 દિવસ 41 ડિગ્રીથી વધુ તાપમાન
એપ્રિલ મહિનામાં ગરમીની વાત કરીએ તો 23માંથી 10 દિવસ 41 ડિગ્રીથી વધુ અને 2 દિવસ 43 ડિગ્રીથી વધુ તાપમાન નોંધાયું છે. શહેરમાં આ વર્ષે એપ્રિલમાં પણ રેકોર્ડબ્રેક ગરમી પડી છે. એપ્રિલના પહેલાં 23 દિવસમાંથી બે દિવસ તાપમાન 43 ડિગ્રીને પાર કરી ગયું છે. 8 દિવસ 42 ડિગ્રીથી વધુ અને 10 દિવસ 41થી વધુ ગરમી નોંધાઈ છે. 8 એપ્રિલે શહેરમાં નોંધાયેલું 44 ડિગ્રી તાપમાન છેલ્લા 10 વર્ષમાં સૌથી વધુ હતું. આ ઉપરાંત એપ્રિલનું સરેરાશ તાપમાન પણ 41 ડિગ્રી આસપાસ રહ્યું છે. આ વર્ષે માર્ચ 27થી એપ્રિલ 23 સુધીમાં બે દિવસને બાદ કરતાં એકપણ દિવસ તાપમાન 40થી ઓછું રહ્યું નથી. તો બીજીતરફ છેલ્લાં 10 વર્ષમાં પહેલીવાર રાજ્યમાં ગરમીનો પારો 15 માર્ચ પહેલાં 40 ડિગ્રીએ પહોંચ્યો હતો. અગાઉ સૌથી વધુ 42.8 ડિગ્રી મહત્તમ તાપમાન 28 માર્ચ-2017ના રોજ નોંધાયું હતું. ગત વર્ષે 29 માર્ચના 41.7 ડિગ્રી સાથે સૌથી વધુ ગરમી નોંધાઇ હતી. (આપની આસપાસ બનતી માહિતીના ફોટા કે વિડીયો અથવા આપની રજૂઆત કે જેને તમે સમાચારમાં સ્થાન આપવા માંગતા હોય, તેને 9328282571 ઉપર વોટ્સએપ કરો અથવા [email protected] ઉપર ઇમેઇલ કરી શકો છો. આપ ટેલિગ્રામની joinchat/SG0NAxhmbJweEQL1Ov-lkg આ લિંક ઓપન કરી ગ્રુપમાં જોડાઈ દરરોજે સમાચારની અપડેટ સમયસર મેળવી શકો છો તથા ટેલિગ્રામમાં અમારી ચેનલ પણ સબસ્ક્રાઇબ કરી શકો છો જેનું નામ છે : faceofnation1 ફેસબુકમાં પણ faceofnation.news નામથી સર્ચ કરી લાઈક કરીન સતત અપડેટ મેળવી શકો છો. ટ્વીટરમાં FaceOfNation1 નામથી સર્ચ કરી ફોલો કરી સતત અપડેટ મેળવી શકો છો).
