Face Of Nation:વડોદરા શહેરની અલકાપુરી સંપતરાવ કોલોનીમાં ભીષણ આગ લાગી છે. ગોકુલેશ 2 કોમ્પલેક્ષના બીજા માળે આવેલા સફિશન્ટ મેનપાવરની ઓફિસમાં આગ લાગી છે. વડીવાડી ફાયર સ્ટેશનના ફાયર ફાયટર્સે ઘટનાસ્થળે પહોંચી આગ પર કાબૂ મેળવવાની કામગીરી હાથ ધરી હતી. જોતજોતામાં જ આગને કારણે ધુમાળાના ગોટેગોટા ઉડ્યાં હતા અને અફડાતફડી સર્જાઇ હતી. જો કે, ભારે જહેમત બાદ ફાયરબ્રિગેડની ટીમે આગ પર કાબૂ મેળવ્યો હતો. આ ઘટનાની જાણ થતાં જ પોલીસ અને મધ્ય ગુજરાત વીજ કંપનીના કર્મચારીઓ ઘટનાસ્થળે પહોંચી ગયા હતા. પ્રાથમિક તપાસ દરમિયાન શોર્ટ સર્કિટને કારણે આગ લાગી હોવાનું સામે આવ્યું છે. આગ લાગવાને કારણે મોટા પ્રમાણમાં નુકસાન થયું છે.
