Face Of Nation 30-06-2022 : લોકપ્રિય કોમેડી સિરિયલ ‘તારક મહેતા કા ઉલ્ટા ચશ્મા’ ચાહકોની ઘણી જ ફેવરિટ છે. આ સિરિયલના દરેક પાત્ર ચાહકોના મનમાં ખાસ સ્થાન ધરાવે છે. સિરિયલમાં નટુકાકાનું પાત્ર ભજવતા ઘનશ્યાન નાયક છેલ્લાં બે વર્ષથી બીમારીને કારણે આવતા નહોતા અને ગયા વર્ષે તેમનું અવસાન થયું હતું. હવે અસિત મોદી સિરિયલમાં નવા નટુકાકા લઈને આવ્યા છે.
નટુકાકાએ હવે નવા નટુકાકા મોકલ્યા
અસિત મોદીએ એક વીડિયો શૅર કર્યો છે. આ વીડિયોમાં અસિત મોદીએ કહ્યું હતું કે આજે તેઓ ખાસ વાત કરવા આવ્યા છે. જ્યારે પણ ગડા ઇલેક્ટ્રોનિક્સની વાત આવે ત્યારે નટુકાકાની યાદ આવે છે. જોકે ઘનશ્યામ નાયક હવે આપણી વચ્ચે નથી. તેઓ આપણને છોડીને જતા રહ્યા છે. અલબત્ત, તેઓ જ્યાં પણ હશે ત્યાં ગડા ઇલેક્ટ્રોનિક્સની કોમેડી જોઈને હસતા હશે અને મિસ કરતા હશે. એ જ નટુકાકાએ હવે નવા નટુકાકા મોકલ્યા છે.
નવા નટુકાકાને પણ પ્રેમ આપજો : અસિત મોદી
અસિત મોદીએ પછી નવા નટુકાકા ઇન્ટ્રોડ્યૂસ કરાવ્યા હતા. તેમણે કહ્યું હતું કે એક કલાકારને માત્ર દર્શકોનો પ્રેમ જોઈએ છીએ. તેમને દર્શકોએ દરિયા ભરીને પ્રેમ આપ્યો છે અને આ માટે તેઓ હંમેશાં દર્શકોના ઋણી છે. તેમને વિશ્વાસ છે કે દર્શકો આ જ રીતે પ્રેમ વરસાવતા રહેશે. તેઓ માત્ર એક જ વિનંતી કરે છે કે આ નવા નટુકાકાને પણ પ્રેમ આપજો. તેમનાથી નાની-મોટી ભૂલ થાય તો માફ કરજો. તેમને આશા છે કે આ નવા નટુકાકા સિરિયલમાં ખરા ઊતરશે.
કિરણ ભટ્ટને નટુકાકા તરીકે લાવવાનું નક્કી કર્યું
અસિત મોદીએ કહ્યું હતું, ‘આ અમારા માટે ઘણી જ ભાવુક ક્ષણ છે. 13 વર્ષથી નટુકાકાનું પાત્ર ઘનશ્યામ નાયક ભજવતા હતા. તેમની જગ્યાએ બીજા કલાકારને લાવવા સરળ નહોતા. અમે છેલ્લા કેટલાક મહિનાથી નટુકાકાના પાત્રનું ઓડિશન શરૂ કર્યું હતું, કારણ કે અમે દર્શકો માટે આ પાત્ર ફરી લાવવા માગતા હતા. થોડાં ઓડિશન બાદ અમે ગુજરાતના જાણીતા એક્ટર-પ્રોડ્યુસર-ડિરેક્ટર કિરણ ભટ્ટને નટુકાકા તરીકે લાવવાનું નક્કી કર્યું. હું તેમને છેલ્લાં ઘણાં વર્ષોથી ઓળખું છું અને જ્યારે ઓડિશન સમયે તેમને પહેલીવાર મળ્યો ત્યારે મને એમ જ લાગ્યું કે આ અમારા નટુકાકા છે. આમ તો ઘનશ્યામ નાયકની જગ્યા કોઈ લઈ શકે તેમ નથી, પરંતુ મને વિશ્વાસ છે કે કિરણ ભટ્ટ દર્શકોમાં પોતાની અલગ જગ્યા બનાવવામાં સફળ રહેશે. કિરણ ભટ્ટ પાત્રને જરૂર ન્યાય આપશે.’
અસિત મોદીએ કહ્યું, શો મસ્ટ ગો ઓન
અસિત મોદીએ છેલ્લે કહ્યું હતું, ‘કલાકારો બદલાતા રહેશે, કોઈ આપણી વચ્ચે નહીં રહે, કોઈ આ સફર છોડી દેશે, પરંતુ પાત્ર ક્યારેય બદલાશે નહીં. શો મસ્ટ ગો ઓન.’ તો બીજીતરફ નવા નટુકાકાએ અસિત મોદીને સવાલ કર્યો હતો, ‘મારો પગાર ક્યારે વધશે?’ આ સવાલ સાંભળીને અસિત મોદીએ કહ્યું હતું કે આનો જવાબ તો જેઠાલાલ જ આપી શકશે.
નવા નટુકાકાનું નામ કિરણ ભટ્ટ છે, તે ગુજરાતી છે
નવા નટુકાકાનું નામ કિરણ ભટ્ટ છે અને તેઓ ગુજરાતી છે. તેઓ પોતાના મિત્રવર્તુળમાં ‘કેબી’ તરીકે લોકપ્રિય છે. કિરણ ભટ્ટ થિયેટર પર્સનાલિટી છે. કિરણ ભટ્ટ થિયેટર ડિરેક્ટર, પ્રોડ્યુસર તથા આર્ટિસ્ટ છે. 2019માં કિરણ ભટ્ટે ‘વેવાઈ V/S વેવાઈ’ ડિરેક્ટ કર્યું હતું. હાલમાં તેમનું ડિરેક્ટ કરેલું નાટક ‘સગપણ તને સાલમુબારક’ના શો ચાલે છે. (આપની આસપાસ બનતી માહિતીના ફોટા કે વિડીયો અથવા આપની રજૂઆત કે જેને તમે સમાચારમાં સ્થાન આપવા માંગતા હોય, તેને 9328282571 ઉપર વોટ્સએપ કરો અથવા [email protected] ઉપર ઇમેઇલ કરી શકો છો. આપ ટેલિગ્રામની joinchat/SG0NAxhmbJweEQL1Ov-lkg આ લિંક ઓપન કરી ગ્રુપમાં જોડાઈ દરરોજે સમાચારની અપડેટ સમયસર મેળવી શકો છો તથા ટેલિગ્રામમાં અમારી ચેનલ પણ સબસ્ક્રાઇબ કરી શકો છો જેનું નામ છે : faceofnation1 ફેસબુકમાં પણ faceofnation.news નામથી સર્ચ કરી લાઈક કરીન સતત અપડેટ મેળવી શકો છો. ટ્વીટરમાં FaceOfNation1 નામથી સર્ચ કરી ફોલો કરી સતત અપડેટ મેળવી શકો છો).
