Face Of Nation:મહેસાણાના એક પોલીસ મથકમાં ફરજ બજાવતી એક મહિલાકર્મીનો ટિકટોક વીડિયો વાયરલ થયા બાદ સતત આવા બનાવો સામે આવી રહ્યા છે. હવે આ કડીમાં વડોદરાના ક્રાઇમ બ્રાંચના પીએસઆઈ અરુણ મિશ્રાનો એક વીડિયો સામે આવ્યો છે. આ ટિકટોક વીડિયોમાં પીએસઆઈ અરુણ મિશ્રા વર્દીમાં નજરે પડી રહ્યા છે. જોકે, વીડિયો વાયરલ થતા જ પીએસઆઈ તરફથી ટિકટોક એકાઉન્ડ ડિલિટ કરી નાખવામાં આવ્યું છે. આ મામલે ડીસીપી જયદીપસિંહ જાડેજાને તપાસ સોંપવામાં આવી છે. તપાસ બાદ આ મામલે પોલીસ કમિશ્નરને રિપોર્ટ કરવામાં આવશે. ક્રાઇમ બ્રાન્ચમાં ફરજ બજાવતા પીએસઆઇ અરુણ મિશ્રાનો ફિલ્મી ગીતો ગાતો ટિકટોડ વિડીયો વાયરલ થતાં શહેર પોલીસ બેડામાં ખળભળાટ મચી ગયો છે. વાયરલ થયેલા વીડિયોમાં પીએસઆઈ પોલીસની વર્દીમાં જ હિન્દી ફિલ્મોના ગીતો ગાતા નજરે પડી રહ્યા છે. આ મામલે ગુરુવારે સાંજે પોલીસ કમિશનરે ડીસીપીને તપાસ સોંપી છે.
ઉલ્લેખનીય છે કે પીએસઆઈ અરુણ મિશ્રા ડીસીબીની ચાંપાનેર દરવાજા ખાતે આવેલી ઓફિસમાં ફરજ બજાવે છે. લોકો જ્યારે ફિલ્મી ડાયલોગ, ગીતો સહિતના રમૂજી વીડિયો ટિકટોક એપ પર બનાવીને સોશિયલ મીડિયામાં અપલોડ કરી રહ્યા છે ત્યારે પોલીસમાં કામ કરતા કર્મચારીઓ પણ તેની લતમાંથી બચી શક્યા નથી. આ જ કડીમાં કેટલાક પોલીસ કર્મીઓએ ખાખી વર્દીમાં સજ્જ થઈને ટિકટોક વીડિયો બનાવી સોશિયલ મીડિયા પર મૂકી દીધા હતા.
