Face Of Nation:અમદાવાદ શહેરના બોપલ વિસ્તારમાં તેજસ સ્કૂલ પાસે પાણીની એક ટાંકી ઘરાશાયી થઈ હતી. જેમાં 3 વ્યક્તિના મોત થયા હોવાનું સામે આવ્યું છે. બાજુમાં આવેલી કેટરિંગના રસોડા પાસે આ ઘટના બની હતી. ઘટનાની જાણ થતાં અમદાવાદ ફાયર વિભાગની ટીમ ઘટના સ્થળે દોડી ગઈ હતી. ટાંકી ખાબકતા તેની નીચે 6 જેટલા લોકો દબાયા હતા. જેમને રેસ્ક્યૂ કરી બહાર કાઢવામાં આવ્યા છે. દુર્ઘટનામાં એક વ્યક્તિના બે પગ કપાઇ જતા તેની હાલ ગંભીર છે. ઇજાગ્રસ્તોને સારવાર માટે હોસ્પિટલ ખસેડવામાં આવ્યા છે.જેસીબીની મદદથી કાટમાળ ખસેડવાની શરૂઆત કરી દેવામાં આવી છે. ઘટનાની જાણ થતાં લોકો પણ મોટી સંખ્યામાં દોડી આવ્યા છે. હજુ પણ બેથી ત્રણ લોકો દટાયેલા હોવાની આશંકા સેવવામાં આવી રહી છે.નોંધનીય છે કે, બે દિવસ પહેલા અમદાવાદના શેલા વિસ્તારમાં દીવાલ ધરાશાયી થતાં ચાર લોકોના મોત થયા હતા. ત્યારે આજે આ જ વિસ્તારમાં બીજી ઘટના બનતા લોકોમાં ભયનો માહોલ સર્જાયો છે.
