Face Of Nation:અમદાવાદ શહેરના ગોતા ઓગણજ રોડ પર બેફામ બનેલા પિકઅપ વાનના ચાલકે ત્રણ વ્યક્તિને અડફેટે લેતા બે વ્યક્તિના મોત નીપજ્યા છે જ્યારે એક વ્યક્તિને ગંભીર ઇજા થતાં સારવાર માટે હોસ્પિટલમાં ખસેડવામાં આવ્યો છે. પિકઅપ વાન ડિવાઈડર કુદાવી સામેના રોડ પર આવી પલટી મારી ગઈ હતી જેમાં આ ત્રણ વ્યક્તિ અને વાહનો પણ અડફેટે આવી ગયા હતા. એ ડિવિઝન ટ્રાફિક પોલીસે વાહનચાલક સામે ગુનો નોંધી તપાસ શરૂ કરી છે.છારોડી પાસે રહેતા વિરસિંગભાઈ ધાખડ તેમના સંબંધી કલ્યાણસિંહ ધાનુક અને રાજેન્દ્ર કુશવાહ અલગ અલગ જગ્યાએ કલર કામ કરે છે. મંગળવારે સવારે 8.15 વાગ્યે ગોતા ઓગણજ રોડ પર કાશી શંકારા સ્કૂલ પાસે તેઓ ઉભા હતા ત્યારે બેફામ સ્પીડે ગોતાબ્રિજ તરફથી એક પિકઅપ વાન આવી હતી. ચાલકે ગાડી પર કાબુ ગુમાવતા ગાડી ડિવાઈડર કુદાવી આ ત્રણેયને અડફેટે લીધા હતા. ત્રણેયને ગંભીર ઇજાઓ થતા સારવાર માટે હોસ્પિટલમાં ખસેડવામાં આવ્યા હતા જ્યાં કલ્યાણસિંહ અને રાજેન્દ્રનું મોત નીપજ્યું હતું. અકસ્માત બાદ પિકઅપ વાન ચાલક નાસી ગયો હતો. આસપાસના વાહનને પણ નુકસાન થયુ હતું.
