Face Of Nation 03-06-2023 : ધીરેન્દ્ર શાસ્ત્રીએ અરજીઓ ખોલી ખોલીને હનુમાનજીના આશીર્વાદ હોવાના દેખાવડા કરીને લોકોને અંધશ્રદ્ધાના એક અંધકારમાં ગરકાવ કરી દીધા છે. બેફામ વાણીવિલાસ કરીને સ્ટેજ ઉપરથી પોતે ચમત્કાર કરતા હોવાના દેખાવડા કરીને લોકોમાં ગજબની અંધશ્રદ્ધા તરફ ધકેલી રહ્યા છે. હાઈટેક યુગમાં લોકો પણ બાબાની “પર્ચી પ્રથા” ઉપર આંધળો વિશ્વાસ કરીને ઘેલા થઇ ગયા છે. બાબા બાગેશ્વર હનુમાનજીના નામે જે પર્ચી અને અરજીના ધતિંગ કરે છે તેનાથી બમણું કાર્ય સુહાની શાહ કરે છે. સુહાની શાહ એક માઇન્ડ રીડર છે. સુહાની શાહે જણાવ્યું છે કે, કેવી રીતે માઇન્ડ રીડ કરવામાં આવે છે. જોકે તેને આ જાદુ ગણાવતી નથી. ધીરેન્દ્ર કૃષ્ણ શાસ્ત્રીના ચમત્કારને સુહાની શાહે માઈન્ડ રીડિંગ ગણાવ્યું છે. આ દરમિયાન, સુહાની શાહે તેના શોમાં આવા ઘણા ઉદાહરણો આપ્યા, જેને જોઈને કોઈ પણ ચોંકી જાય છે. ધીરેન્દ્ર શાસ્ત્રી ધર્મના નામે એક નાટક અને ધતિંગ સિવાય કઈ કરી રહ્યા નથી. ધીરેન્દ્ર શાસ્ત્રી એક વાત સારી રીતે જાણી ગયા છે કે, માઈન્ડ રીડિંગની આવડતને જો ધર્મ સાથે જોડી દેવામાં આવે તો પૈસો અને પ્રતિષ્ઠા બંને ખુબ જ ઝડપી ઉભી થઇ શકે છે.
સુહાની શાહના જણાવ્યા અનુસાર, માઈન્ડ રીડિંગની વૈજ્ઞાનિક પદ્ધતિઓ છે, જેનો ઉપયોગ કર્યા પછી એવું લાગે છે કે, કોઈ ચમત્કાર થઈ રહ્યો છે. ઘણી વખત લોકોએ તેમના આ માઈન્ડ રીડિંગને ચમત્કારિક શક્તિ ગણાવી હતી, ત્યારબાદ તેણે લોકોને આવું કરવાની ના પણ કહી હતી. આ એક વૈજ્ઞાનિક પદ્ધતિ છે. આ કરતા પહેલા એ સમજવું પડશે કે તે વ્યક્તિ વર્તમાન સમયે કઈ પરિસ્થિતિમાં છે અને તે સમયે તે શું વિચારી શકે છે. વ્યક્તિની પૃષ્ઠભૂમિ જોઈને પણ ઘણું સમજી શકાય છે. સુહાની શાહના કહેવા પ્રમાણે, લોકો આને ચમત્કાર માને છે અને પછી અંધવિશ્વાસની જાળમાં ફસાઈ જાય છે. સુહાની શાહ વ્યવસાયે માઇન્ડ રીડર તરીકે ઓળખાય છે. તેણે આ અંગે ઘણા વીડિયો પણ બનાવ્યા છે, જેમાં તે પોતાનું કૌશલ્ય બતાવતી જોવા મળી રહી છે. સુહાની શાહનો જન્મ રાજસ્થાનમાં થયો હતો, પરંતુ તેનો ઉછેર અમદાવાદમાં થયો હતો. યુટ્યુબ પર તેની જબરદસ્ત લોકપ્રિયતા છે. તેના જાદુના ઘણા વીડિયો સોશિયલ મીડિયા પર ખૂબ વાયરલ થયા છે. સુહાની શાહે ઘણા પુસ્તકો પણ લખ્યા છે, સાથે જ તે લોકોને પ્રેરિત પણ કરે છે. સુહાની શાહે એ પણ જણાવ્યું કે, તેણે તેના પિતા પાસેથી માઈન્ડ રીડિંગ શીખ્યું છે.
જો સુહાની શાહ ધારે તો તેની આ આવડતનો ઉપયોગ કરીને કોઈ માતાજીની કૃપા દ્રષ્ટિથી તે આમ કરતી હોવાનું જણાવીને અનેક લોકોને પોતાની આગળ ઝૂકતાં કરી દે અથવા તો અનેક લોકોને તેના અનુયાયી બનાવી દે તેમ છે પરંતુ તે તેની આવડતને કોઈ ધાર્મિકતા સાથે જોડીને લોકોને અંધશ્રદ્ધા તરફ ધકેલવા માંગતી નથી, તેથી તે ક્યારેય ધર્મને પોતાની આવડત સાથે જોડતી નથી અને તેને ધાર્મિક વેપાર બનાવતી નથી. બાબા બાગેશ્વર જેવા અનેક લોકો છે જે તમને ચમત્કારના નામે ઝુકાવી દે પરંતુ એ અંધશ્રદ્ધામાં તમે કેટલા ગરકાવ થાઓ છો તે ઉપર તેમના ધંધાની આવક અને પ્રતિષ્ઠા નક્કી હોય છે. (ફેસ ઓફ નેશન બાબાનું વિરોધી નથી કે આ લેખ બાબાની વિરૂધ્ધમાં કે કોઈ ધર્મગુરુની વિરૂધ્ધમાં નથી પરંતુ ફેસ ઓફ નેશન અંધશ્રધ્ધાને પ્રોત્સાહન ક્યારેય આપતું નથી) (આપની આસપાસ બનતી માહિતીના ફોટા કે વિડીયો અથવા આપની રજૂઆત કે જેને તમે સમાચારમાં સ્થાન આપવા માંગતા હોય, તેને 9328282571 પર વોટ્સએપ કરો અથવા [email protected] ઉપર ઇમેઇલ કરી શકો છો. ફેસબુકમાં faceofnation.news નામથી સર્ચ કરી લાઈક કરીન સતત અપડેટ મેળવી શકો છો. ટ્વીટરમાં FaceOfNation1 નામથી સર્ચ કરી ફોલો કરી સતત અપડેટ મેળવી શકો છો).
