Face Of Nation 26-02-2022 : અમદાવાદ ઇન્ટરનેશનલ એરપોર્ટ પર બે દિવસ પહેલા શંકાસ્પદ હાલતમાં અટકાયત કરાયેલી કેન્યાની યુવતીના પેટમાંથી ડ્રગ્સની 50થી વધુ કેપ્સ્યૂલ કાઢ્યા બાદ યુવતીની તબિયત લથડતા તેને સિવિલમાં દાખલ કરાઈ હતી, જ્યાં તેનું મોત નિપજ્યું હતું. આ અંગે કસ્ટમ વિભાગે પોલીસને જાણ કરતા એરપોર્ટ પોલીસ સ્ટેશનમાં આ મામલે અકસ્માત મોતનો ગુનો દાખલ કરીને વધુ તપાસ હાથ ધરવામાં આવી છે.
પેટનો એક્સરે અને સોનોગ્રાફી કરાતાં ભાંડો ફૂટ્યો
અમદાવાદ ઈન્ટરનેશનલ એરપોર્ટ પર 23મી ફેબ્રુઆરીના રોજ કેન્યાથી એક યુવતી અમદાવાદ આવી હતી. આ યુવતીની શંકાસ્પદ હિલચાલને ધ્યાને લેતા કસ્ટમના અધિકારીઓએ તેને રોકી પૂછપરછ કરતા તે ભાંગી પડી હતી અને તેના પેટમાં ડ્રગ્સની કેપ્સ્યૂલ હોવાનું પ્રાથમિક પૂછપરછમાં કબૂલ્યું હતું, જેના પગલે આ યુવતી શિખોલી ડાયના (ઉં.35)ને સિવિલ હોસ્પિટલમાં લઈ જવાઈ હતી. જ્યાં તેના પેટનો એક્સરે અને સોનોગ્રાફી કરવામાં આવતા તેના પેટમાં ડ્રગ્સની કેપ્સ્યૂલ હોવાનું માલૂમ પડતાં કેપ્સ્યૂલ કાઢવા પ્રક્રિયા હાથ ધરાઈ હતી, જેમાં શિખોલી ડાયનાના પેટમાંથી 50થી વધુ ડ્રગ્સની કેપ્સુલ મળી આવી હતી. દરમિયાન 24 ફ્રેબુઆરીની સવારે શિખોલી ડાયનાની તબિયત લથડતા તેને આઈસીયુ વોર્ડમાં શિફ્ટ કરી સારવાર શરૂ કરવામાં આવી હતી. જોકે 24 મીની સાંજે તેનું મોત નિપજ્યું હતું. આ અંગે કસ્ટમ વિભાગે પોલીસને જાણ કરતા એરપોર્ટ પોલીસ સ્થળ પર દોડી આવી હતી અને આ મામલે હાલના તબક્કે અકસ્માત મોતનો ગુનો દાખલ કરી પેનલ ડોક્ટરો દ્વારા તેનું પોસ્ટમોર્ટમ કરવાની કાર્યવાહી હાથ ધરી હતી.
કેપ્સ્યૂલ પેટમાં ફાટતાં મોત થયાની આશંકા
સૂત્રોમાંથી મળતી માહિતી અનુસાર કેન્યાની યુવતી શિખોલી ડાયનાના પેટમાં ડોક્ટરોએ 50થી વધુ ડ્રગ્સની કેપ્સ્યૂલ કાઢી હતી, જે શંકાસ્પદ ડ્રગ્સ કોકેઇન હોવાનું મનાઈ રહ્યું છે. જોકે આ બાબતે પુષ્ટિ કરવા માટે કેપ્સ્યૂલ તપાસવા એફએસએલની મદદ લેવામાં આવી છે. દરમિયાન હજુ યુવતીના શરીરમાં રહી ગયેલા એક કે તેનાથી વધુ કેપ્સ્યૂલ પૈકી કોઈ એક કેપ્સ્યૂલ ફાટી જતા તેની તબિયત લથડતા મોત નિપજ્યું હોવાનું પ્રાથમિક તારણ બહાર આવી રહ્યું છે. જો કે પોસ્ટમોર્ટમ રિપોર્ટ આવ્યેથી આ બાબતે વધુ સત્તાવાર બાબત જાણી શકાશે. (આપની આસપાસ બનતી માહિતીના ફોટા કે વિડીયો અથવા આપની રજૂઆત કે જેને તમે સમાચારમાં સ્થાન આપવા માંગતા હોય, તેને 9328282571 ઉપર વોટ્સએપ કરો અથવા [email protected] ઉપર ઇમેઇલ કરી શકો છો. આપ ટેલિગ્રામની joinchat/SG0NAxhmbJweEQL1Ov-lkg આ લિંક ઓપન કરી ગ્રુપમાં જોડાઈ દરરોજે સમાચારની અપડેટ સમયસર મેળવી શકો છો તથા ટેલિગ્રામમાં અમારી ચેનલ પણ સબસ્ક્રાઇબ કરી શકો છો જેનું નામ છે : faceofnation1 ફેસબુકમાં પણ faceofnation.news નામથી સર્ચ કરી લાઈક કરીન સતત અપડેટ મેળવી શકો છો. ટ્વીટરમાં FaceOfNation1 નામથી સર્ચ કરી ફોલો કરી સતત અપડેટ મેળવી શકો છો).
