Face Of Nation : બેફામ હંકારાતા સાધનો નિર્દોષ માટે જીવલેણ સાબિત થઈ રહ્યા છે. ઘરેથી શાળાએ જવા નીકળેલી માસુમ બાળકીને ટ્રકે ટક્કર મારતા તેનું મોત નીપજ્યું હતું. સાઇકલ લઈને સવારે ઘરેથી પોતાના ઉજ્વવળ ભવિષ્યના શિક્ષણ માટે નીકળેલી બાળકીને ખબર પણ નહીં હોય કે આજે તે શાળા સુધી પહોંચશે કે કેમ ? પોતાની વ્હાલસોયી દીકરીને શાળાએ મોકલનાર માતાપિતા અને પરિવારજનોને આ આઘાત જનક સમાચાર મળતા જ તેમના ઉપર જાણે કે આભ ફાટી પડ્યું હતું. એસપી રિંગ રોડ પર વસ્ત્રાલ ચાર રસ્તા પાસે આજે વહેલી સવારે ટ્રકની અડફેટે વિદ્યાર્થિનીનું મોત નીપજ્યું છે. ટ્રકચાલકે સાઈકલ પર જતી વિદ્યાર્થિનીને ટક્કર મારતા તે નીચે પટકાઈ હતી અને તેનું ઘટનાસ્થળે જ મોત થયું હતું. અકસ્માત સર્જીને ટ્રક ડ્રાઈવર ફરાર થઈ ગયો હતો. મૃતક વિદ્યાર્થિની વસ્ત્રાલની માધવ સ્કૂલમાં અભ્યાસ કરતી હોવાનું સામે આવ્યું છે. રોષે ભરાયેલા લોકોએ ટ્રક પર પથ્થરમારો કર્યો હતો.
